ACTUACIÓN DE CÁNDIDO PAZÓ

O luns 14 de xuño, o alumnado do centro asistiu ao espectáculo "O falar non ten cancelas" do actor e contacontos Cándido Pazó. Con este espectáculo concluíron as actividades que o ENDL programou para este curso.

OBSEQUIO LETRAS GALEGAS

Como outros anos, co gallo das Letras Galegas, o ENDL entregou á comunidade educativa un obsequio. Nesta ocasión cun caligrama confeccionado polo alumnado. A actividade desenvolveuse conxuntamente con outros centros.

lll CONCURSO JOAO DE NÓVOA

A entrega de premios do III Concurso Joao de Nóvoa enmárcase dentro das actividades organizadas para conmemorar as Letras Galegas 2010. Este concurso está destinado a todo o alumnado do centro e ao de 6º de Primaria dos centros adscritos.

(6º PRIMARIA)

Prosa:
-Raquel Estévez Prado: “A inmigrante”.
-Rocío García Mojón: “Melanie”.

(1ºESO)

Poesía:
-Cristina Otero Mangana: “A vida”.
-Brais Rodríguez Mangana: “A túa cara”.

Prosa:
-Xiana Conde Alonso: “O xigante do San Mamede”.
-Pablo Iglesias Limia: “Nun planeta moi afastado”.


(2ºESO)

Poesía:
-José Manuel Quiroga Moutién: “Ollos de amor”.
-Martín Köster Escalada: “Emigrantes”.

Prosa:
-María Losada González: “Son do monte!”.
-Madalina Ionela Pirghie: “O neno mosca”.

(3ºESO)

Prosa:
-Álvaro Souto Janeiro: “Todos xuntos facemos máis”.

(1ºBAC)

Poesía:
-Nancy Feijoo Pato: “Eva”.

CORRELINGUA

O alumnado de 1º ESO participou activamente na tradicional carreira pola lingua. A actividade vén desenvolvéndose dende o curso 2000-2001 en distintas vilas galegas. Este ano celebrouse baixo o lema "Galego, a forza do noso amor". Miles de rapaces, en toda Galicia, amosaron o seu compromiso na defensa da lingua e reclamaron o dereito a medrar en galego.

VISITA DIDÁCTICA A CELANOVA

Hoxe, as alumnas e alumnos de 3º e 4º ESO, fixemos unha visita a Celanova. Alí, guiados por Paula, coñecemos a Casa dos Poetas, o Mosteiro de San Rosendo e a biblioteca do IES de Celanova. Fixemos parte da ruta currosiana, detivémonos en Penalta e en Einibó, onde lemos os poemas de Curros: "O gaiteiro de Penalta" e "Unha voda en Einibó". Xantamos en Celanova e, pola tarde, achegámonos a ver a Virxe do Cristal e Vilanova dos Infantes. Nesta vila detivémonos diante da casa de Méndez Ferrín e visitamos o Centro Comarcal. Ao longo de todo o percorrido lemos distintos poemas de Curros, Celso Emilio Ferreiro e Méndez Ferrín.

VISITA DE FRANCISCO CASTRO

O escritor Francisco Castro visitou o noso centro. Compartiu co alumnado de 1º, 2º e 3º de ESO unha interesante charla na que falou sobre as obras lidas neste trimestre: Chamádeme Simbad, O ceo dos afogados e Un bosque cheo de faias.

IMOS DE ENTROIDO

O alumnado de 1º ESO deseñou unha plana dun cómic coa figura típica do entroido de Maceda como protagonista. Posteriormente fíxose unha exposición con todos os traballos realizados.

BICOS LITERARIOS

Aproveitamos a celebración do 14 de febreiro para realizar unha tarxeta de felicitación coa recomendación dunha obra literaria de amor. Son os nosos Bicos Literarios, unha pequena contribución do alumnado para fomentar a lectura entre os compañeiros/as. Dámoslle continuidade así ao Nadal Literario, actividade realizada coa mesma finalidade.

O MURO DOS DESEXOS

Para conmemorar o Día da Paz, inspirándonos nunha actividade realizada noutros centros, realizamos o noso particular Muro dos Desexos. Confeccionamos un lema cun desexo para contribuír á consecución da Tolerancia, Solidariedade, respecto aos Dereitos Humanos, Non Violencia ou Paz.

VISITA DIDÁCTICA AO XORNAL LA VOZ DE GALICIA

Como complemento ao estudo do xornal na aula, o alumnado de 1º ESO realizou unha visita ás instalacións de La Voz de Galicia no polígono de Sabón na Coruña. Realizaron un percorrido polas instalacións onde lles explicaron o proceso de realización dun xornal. A visita rematou no Museo da Prensa, alí puideron observar exemplares de xornais e máquinas de produción periodística doutras épocas. O grupo foi felicitado pola súa atención, participación e bo comportamento. No propio xornal publicouse unha crónica da visita á que se pode acceder premendo na fotografía.

Ao rematar a visita desprazámonos ata a praia de Sabón, alí comemos e demos un pequeno paseo á beira do mar.