"SOBRE A FALA"

Despedímonos ata setembro coa voz de Manuel María recitando o poema "Sobre a fala".

A FALA...

A fala é comunión e sentimento

historia compartida intimamente,

sufrimento de todos,

amor de cada un

e tamén amor de todo o pobo, 

laio e canción,

nai que nos abrangue i arrola,            

estrela milagreira que nos guía

e fai que os nosos corazóns

latexen xuntos.

A fala é a voz da terra

e mais do mar, 

o vencello que nos xungue

no tempo cos que foron

e mais cos que han de ser.

Desconfía, ¡ouh pobo meu!,

estén alerta contra aqueles

que deixan a túa fala

e din que te aman.

Quen non está contigo

é teu inimigo, aínda 

que os seus beizos 

che mintan un amor

que nunca alumou o seu corazón.

Versos pra un país de minifundios (1969). Manuel María

Con estes versos de Manuel María sobre o valor da lingua despedímonos ata setembro. Bo verán!