DÍA DO LIBRO

Conmemoramos o  Día  do  Libro  coa  presentación  dunha  escolma de vídeos realizados polo alumnado de 4ª ESO para promocionar autores/as e obras da nosa literatura e tamén traducións á nosa lingua.

Ámote Leo. Destino Xalundes. Rosa Aneiros

Rocío García Mojón

O neno do pixama a raias. John Boyne

Sara Garrido Parada

Pel de lobo. Xosé Miranda

Edei Otero Conde

O pintor do sombreiro de malvas. Marcos Calveiro

Madalina Mihaela Culitá 

ENCONTROS CON AUTORES

Durante este curso escolar o EDLG colaborou co Equipo de Dinamización da Biblioteca Escolar na promoción e dinamización da lingua participando nos clubs de  lectura, nos encontros con autores e nas Tertulias literarias. Visitaron o noso centro: Manuel Núñez Singala, Marcos Calveiro e Ramón Carredano; e asistimos, xunto con outros centros da provincia, aos faladoiros literarios con Santiago Lopo e Manuel Portas. 

DÍA INTERNACIONAL DA MULLER

O 8 de marzo conmemórase o Día Internacional da Muller. Preme no enlace se queres saber algo máis sobre a historia deste día. 

CONTADAS

Tras a lectura e análise de Contos de medo do museo e como paso previo á visita ao Museo Provincial de Lugo, o alumnado de 2º ESO agrupado en equipos realizou a contada dun dos relatos do libro. Velaquí unha pequena mostra: 

POETAS GALEGAS

Asistimos ao I Recitado poético de autoras galegas que este ano organizamos  para conmemorar o Día Internacional da Muller. O alumnado de 2º ESO C participou neste festexo coa lectura de poemas na biblioteca do centro. 

OLLOS DE AULA Nº13

Chega o número 13 correspondente aos meses de marzo e abril de Ollos de aula, a revista que edita a CGENDL para as familias do alumnado. Que contidos nos achega? Segundo a CGENDL,  unha colaboración de Concha Costas, presidenta de Espazo Lectura, sobre o papel que deben asumir nais e pais na adquisión dos hábitos lectores dos seus fillos e fillas; unha nova "palabra do ensino" da man de Lines Salgado: as adaptacións curriculares; e as interesantes propostas de lecer de Gracia Santorum. E algo máis? Pois si, non esquecemos a importancia do almorzo para o desenvolvemento dos nenos e nenas e para o seu rendemento escolar. E, para rematar, un desexo: gocemos da primavera e o sol vestindo con autoestima, elegancia e estilo a mellor das nosas roupas, a lingua e a cultura galegas.

Ollos de aula. nº 13. versión para imprimir en a4 a dobre cara from Coordinadora Galega ENDL

RECITANDO A ROSALÍA

Para celebrar o Día de Rosalía, alumnos e alumnas de 2º ESO C participaron na lectura de poemas da autora na biblioteca do centro. 

TODAS CON ROSALÍA

Dende a Asociación de Escritoras e Escritores en Lingua Galega facilítannos a ligazón da segunda parte do vídeo "Todas con Rosalía". En palabras do Consello Directivo da AELG: "Nesta ocasión un grupo de escritoras galegas dá vida a Rosalía nun  vídeo colectivo no que teñen cabida palabras e músicas de mulleres, nenas, mozas e vellas. Mulleres falando de mulleres, e ao tempo, falando de todos e para todos nós, falando dos que aquí e agora sofren, seguindo o exemplo de conciencia e rebeldía da grande escritora ao recitar os seus versos desde o presente. 

As gravacións amateurs foron montadas e editadas pola cineasta Raquel Rei. Participan, entre moitas outras, Marta Dacosta, María Canosa, Concha Blanco, Mercedes Leobalde, Berta Roca, Fina Casalderrey, Isabel Risco, Lorena Souto, Pilar García Negro".

OLLOS DE AULA NO CENTRO

Ollos de aula, a revista da Coordinadora Galega de Equipos de Normalización e Dinamización Lingüística, ocupa un lugar relevante no centro. Podedes atopala na biblioteca e na sala de espera destinada ás familias. 

OLLOS DE AULA Nº12

Neste número, segundo di o CGENDL, "preguntámonos, da man de Mª Montserrat Castro Rodríguez (profesora da Facultade de CC.EE. da UdC), se os nenos e as nenas teñen unha idade para comezar a ler, e tamén polo uso do teléfono móbil no contexto escolar e familiar grazas a José Raposeiras Correa (Catedrático de Ensino Secundario e Doutor pola UVigo), que nos achega unhas conclusións de grande interese. Na sección "Palabras do ensino", de Lines Salgado, é a quenda das "reválidas" recuperadas pola LOMCE, mentres que Gracia Santórum non falta á súa cita con gorentosas propostas literarias e musicais".